سایین شاعیریمیز و عزیز دوستوموز ، هادی قاراچای جیناب لاری

 آنانیزین دونیا دییشمه سینین خبرینی ائشیتمک دن چوخلو اوزولدوک .

هر بیر دیرلی آذربایجانلی نین آناسی بیر عصمت و حیماسه آناسی دیر  بو آجی  اولای اوچون سیزه و عایله نیزه باشینیز ساغ اولسون دئییب بو آغیر غمی سیز له پایلاشماق ایسته ییریک.

بویوک تانری دان سیزین ایللرجه بئله باش اوجا یاشاماغینیزی دیله ییریک.

سایقی لارلا

محمد ریضا لوایی ، ائلیاد موسوی

دوشونورم و دوشونه بیلمیرم

دوشونورم بو قدر آدام سیزلیغا و دوشونه بیلمیرم بو قدر آدام سیزلیغی.

هاوا سویوقدور، سنه سلام وئرن یولداش لارین باخیش لاری کیمی. هاوا سویوقدور سن سیز لیک کیمی وطن سیز لیک کیمی.

ائله دوز بو آن یو لا دوشمه لی سن و داغیلمالی سان هر نه یین آراسیندا.

چئوریلمه لیسن، اوشاقلاریمیزین دوداقلاریندا کی گولوشه ،قوجا آنا لاریمیزین گوزلرینده کی  یاشا.

سویا

 تورپاغا

هاوایا

اودا

 چئوریلمه لیسن.

 یالنیز یاددان چیخارمامالی سان کی سن بیر گون وطنه ، سئوگیه ، اؤزگورلویه آند ایچیبسن (؟).

...

 ۱

سنین ساچلارین عوصیان بایراغی دیر

اینقیلاب جیسارتی باغیشلاییر اورییمه

سئودا فاکولته لرینده دؤیوش اؤیرتمه نی دیر

باغلی قاپي  لارین آرخاسیندا سیاست چی لرین

دیز چؤکدویو چاغدا.

خییاوان لارین آزادلیغا اوزانان الی دیر

مدنییته یوروین آیاغی.

تانرینین آووجودور آچیلمیش یئر کوره سینه

شیطاندان اوغورلانمیش آس ورقدیر

یئره تیکیر بیزی.

بئله ايسپيري له بویالی اولسادا

بئله حسرت له دولو اولسادا

تبریر کوچه لریدیر

دلی لیک گزدیریر رؤیالاریمدا.

سؤزلوک کیمی یئرلشدیره بیلیر

^ ساواش^ و ^سئوگی ^ نی بیر صحیفه ده.

منیم مانیفستیم دیر سنین ساچلارین

آیدین لیقدیر  سپيلير  شعرسل لیییمین دالیسیجا

سوزولور آغ کاغیذلاریمین یاناغینا.

سنین ساچلارین آلقیش لانیر سالون لاردا

بوغازلاردا باغیرتی یا چئوریلیر

دؤیؤش لرده سیلاحا.

آما نه اولار(؟!)

چک اؤرتویونو گولوم

گیزلت ساچلارینی

آخی توخونور ایگیتلیییمه گوله ن ساچلارین

توخونور ایگیتلیییمه....

ائلیاد موسوی